قصص ابو عبدو جارنا- فرن الذرّة..(19)

يمكن نص شباب الحارة اشتغلوا بفرن اسمه فرن "الذرّة" طبعا لا فيه ذرة و لا نووي ..بس كل الافران اللي بعرفها بحلب اسمها فرن الذرّة ليش ما بعرف!..
ما علينا .. المهم انه #ابوعبدوجارنا اشتغل بالفرن لانه بيحب دوام الفرن كتير من ال٤ . فجرا حتى ال١١ قبل الضهر و باقي اليوم كله معك.. و هالحكي على ما اذكر بشتوية ٢٠٠٩ لانه بتذكر وقتها انه اجا المعلم دكتور العيون و مرته على حلب مشان يزوروا خولة اللي عمرها ٤ سنوات و اغتصبوها اربع شباب جنب صالة افراح بمساكن هنانو.. الجريمة وقتها كانت وحدة من الجرايم اللي كان الاعلام شغال عليها بحلب .. و ما بعرف ليش كانت شغلة الاعلام انه يحكي عن الجرايم بحلب و بس .. و كأنه ما في جرايم غير بحلب!

المهم كان الحديث الشاغل للشارع هي الجريمة و زيارة الدكتور الريّس و مرته لبيتها.. و انه رح ينعدموا هدول الاربع مجرمين.. و حتى وقت شفت ابو عبدو جارنا رجعان من الشغل بالفرن و تيابه كلها طحين حتى رموشه و حواجبه كمان ضحكت و قلتله: صاير شبح لك يا ابو عبدو .. دير بالك لا ترعب الاولاد و تروح بخبر كان هه..

بس أبو عبدو ما ضحك .. كان محرور .. رجعت قلتله:
- اشبك ابو شريك .. ليش محرور؟
- لك عيفني بهمي يا زلمة .. طلع صاحب الفرن عديل ابن خالة ابوه للي اغتصب البنت!
- اي و اش الفكرة يعني ؟
- اشو الفكرة! الفكرة انه اهل الحارة عبيقولوا انه لازم ابو نمر صاحب الفرن يتقلع من الحارة..
- اوف اوف!! و مين هاد اللي طالع هالنظرية؟
- ابو هاشم صاحب الكشك.. اكتر واحد عبينكش .. شي ابو نمر زار الزلمة في البيت بسنة ٢٠٠٥ و شي بيطبع ورقة لابو نمر متصور قال مع ابوه للولد ..
- اي و انت ليش مزعوج شو دخلك؟
- لك شلون شو دخلني ؟ من وقت طالع هالحكي و قرروا اهل الحارة انه ابو نمر لازم يتقلع من الحارة و بلشت العالم تتنقنق .. واحد بيقول خبزكن محروق .. و التاني الوزن مو نظامي... التالت كل الشغيلة بالفرن حرامية..

و صار يبكي ابو عبدو .. انا اول مرة بشوفه عبيبكي .. و هو عبيشهق و يبكي قلي:
- بربك يا ابو فاروق انا بعد هالعمر يقولوا عني حرامي؟ لك شو دخل هي القصة بهي وهديك بهديك!
- مين عبيقول عنك هالحكي؟
- اول واحد بياع المازوت الاشقر عباس..  اللي . كان بدو يعبيلي انقص ١٠٠ لتر بالخزان و كشفته و تقاتلنا .. اجته فرصته و بلش هون و هون.. صارت شغلته و عملته.. حتى بعتلي دورية شرطة من كم يوم عالبيت قال انا سارق موبايل امه.. اجوا لعندي و اعتذروا مني و راحوا ..
- لعمة شقد تافه .. طيب انت ليش عبتدافع عن ابو نمر؟
- لك ما عبدافع عن حدا يا زلمة .. بعدين الزلمة اش ذنبه ؟ هو اللي اغتصب خولة ! قرايبه من بعيد و متبري منه ..بس الناس ما بدهن يصدقوه بدهن ياه يطلع من الفرن او بيعملونا حرامية و نشالين و مجرمين لانه عم نشتغل معه !

و هيك كل يوم صار يرجع ابو عبدو على بيته و هو حزين و كئيب اكتر من اليوم اللي قبله .. لحتى تفاجأ بيوم من الايام انه صاحب الكشك ابو هاشم عم يعرض على ابو نمر شرية طحين عن طريق رفيقه .. و بياع المازوت عباس عم يبيع مازوت للفرن من تحت لتحت و بيسب و بيشتم اللي بيشتغل بالفرن قدام الناس..

 كان الدنيا عصريات و انا عم اسمع زياد الرحباني عبيغني عايشة وحدا بلاك.. و لما وصل لعند "حاجي . تحلل بحياتك .. تسلملي تحليلاتك.." دق الباب .. ركضت عالناضور شفت ابو عبدو الحزين .. فتحت الباب.. و قعدنا على قرص الدرج.. كان ابو عبدو قرفان كتير:
- خير اب عبدووو..
- مو انت نصحتني يا ابو فاروق انه ما اترك الفرن ؟
- اي مزبوط.. لا ترد عليهن هدول علاكين و انتو شغلكن نظامي..
- ايوا .. لكان شلون بتحكي لابو محمد بياع السحلب انه كرهان الفرن.. و صاحب الفرن ؟
- اه.. اي.. اااا.. يا ابو عبدو اش بدي اقلك .. الكل عم يسب عالفرن و عبيقول حرامية و عبتغشوا بالوزن و حتى اخر ما حرر انه عم تحطوا كافور بالخبز مشان توقفوا نسل الحارة لانه متعاملين مع اسرائيل..
- هاد انت يا ابو فاروق صاحب العقل؟
- لك يا ابو عبدو .. اذا جن ربعك عقلك ما ينفعك..
- عكل حال لا تشتروا من عنا خبز انتو عضوات .. منبيع للناس العادية اللي مالها مصالح و ما بتعرف تضرّ و تتخرين.. و ما رح يوقف الفرن يا ابو فاروق..
- انا بقلك شغلة ابو عبدو.. انت لا بقى تقول انك عبتشتغل بالفرن .. كل الحارة بتعرفك نظامي و ما بتاكل حرام..ما حدا عبيحكي عليك .. نحن عم نحكي عن ابو نمر..
- اش اقول لكان؟ انه عبشتغل بياع احذية ؟ اشبك يا زلمة ؟! عكل حال في الله..

لعمة انا وقتها صرت قد النملة.. شو اعمل لك الفرن خبزه كويس.. بس مالي عين ادافع عنه قدام الشباب لانه الكل متفق عليه بدهن يسكروه .. حتى ابو عبدو صار يحسسني انه اذا انمسك و انحبس بيكون برقبتي .. و قعدت افكر بحل طول الليل و تاني يوم قررت ابادر بالحل .. و نزلت و جمعت اهل الحارة و الكبارية و حكيت كلشي عندي.. حكيت حكيت ..يمكن اكتر من ساعتين .. طبعاً متوقعين انه لاقيت الحل؟ اللي انحلّ وقتها هي رقبتي بعد ما اكلت بزقات و بهدلات من كل الحاضرين و بقيت بالحمام ٣ ساعات عم فكر بالتصرف اللي تصرفته .. و شقد انا متهور؟ الشغلة اكبر مني و من مبادراتي الجحشة..

اهل الحارة ما بقى يرموا عليي السلام .. و اجا وقتها زارني ابو عبدو و قلي انه بيعرف كلشي حكيته و بيعرف ليش هيك صار فيني وقلي ابو نمر خايف يجي يسلم عليك مشان ما تركبك التهمة .. قلتله :  عليك و عليه و عاللي تأثر بكلامك .. و قلعته لابو عبدو ..
ما رجعنا نحكي انا و ابو عبدو مع بعض لحتى ترك الفرن .. وقت ترك الفرن صار بطل قومي .. انشال ع الاكتاف و عملناله عراضة..

هلأ صحي بقي ابو عبدو عبيدور على شغل ٧ شهور و عايش بالدين .. و صحي اشتغل ابو  هاشم كشك و عباس بياع المازوت مع ابو نمر لاحقاً.. و صاروا يطالعوا تبريرات لابو نمر و رجعت سمعته دهب .. بس صار ابو عبدو بطل قومي و انشال عالكتاف لمدة ١٠ دقايق و فرح كتير ..