قصص أبو عبدو جارنا - أبو عمارة و انتحار أبو عبدو (23)

بين البنايات المهدّمة و البيوت المايلة .. بين البلاكين المعلقة.. بحلب الشرقية .. عايش أبو عبدو جارنا اليوم.. و تحديداً بحارة اسمها بستان القصر..

أبو عبدو كان شيخ شباب .. طول عمره بيشتغل و بيكدح و ع قولته من البيت للشغل و من الشغل للبيت.. و ما طلع من بيته و لا من حارته .. لا بوجود القصف و لا بعد ما وقف القصف..

كانت ذكرياتي مع ابو عبدو كتير حلوة .. و كان مصدر للضحك و الفرح .. بس اليوم ما بعرف شبه متغير.. صاير حزين و محبط و أموره تعبانة.. حتى محاولات ام عبدو انها تعمله اصبع بإيدها تماشياً مع وصايا الوالدة ..

ما بقى تأثر بأبو عبدو .. و خافت كتير عليه .. يعني ما عاد في منافسة بحكم البيت..

اتصلت ام عبدو بزوجتي و ترجتها احكي معه .. و أشوف شبه ؟

قلتلا لمرتي شو بدي احكي معه .؟ يعني حالنا أحسن من حاله ؟ هاتي لأشوف !

ألو مرحبا أبو عبدووووو "هيك مطيتا مشان يتذكر أني موين"

قلي بثقة غريبة: أهلين أهلين أبو فاروق .. مرتي حكت مع مرتك مشان تطالعني من حالة الكآبة؟

قلتله: أوف أوف ؟ عم تقرا افكار و لا اشتغل مخك بغيابي؟

قلي: من شهرين هالحالة .. قلت يمكن من كتر ما رحت و جيت عالفرع .. صرت اعرف كيف بيفكر و بيحلل المحقق .. قلي شو بدك تقلي و خلص ما بدها مقدمات..

قلتله: شوف يا أبو عبدو ..

قاطعني و قلي: بدك تحكيلي عن الأمل و الحياة الحلوة بس نفهمها صح؟

قلتله مدهوشاً: أي و الله مزبوط .. لك صاير مالك سهل يا ابو عبدو؟ خير ليش مكتئب لكان طالما عم تعرف الشغلة قبل ما نقولها و عم تقرا افكار ؟!!!

قلي: شفت البارحة سيادته عالتلفزيون ..

قلتله: أي؟ مشان هيك مكتئب ؟ يعني عرفت كلشي عم يدور بمخه !

قلي: و هي القفزة اللي بدي اقفزها هلأ... بمناسبة أنه ما قريت شي أبداً.. شلون فنجان القهوة الأسود بأسود؟ فاضي بس بيخوف و أسود أسود .. هلأ بدك شي؟

قلتله: لك قفزة ايش ابو عبدو وين انت؟

قلي: بالطابق ال16 فوق القصر البلدي .. يلاااااااااا

بس من حسن حظه لأبو عبدو .. وقع فوق راس مسؤول كبير .. و مات المسؤول .. و تبنت أبو عمارة العملية.. و صابني الاكتئاب إلي..

و أبو عبدو بالمشفى متكسر من 3 أيام .. طلع راس المسؤول يابس..

موطن الشاهد: الطير الطاير ما منخليه يتبنى قبلنا .. التبني هو شعارنا